【最近網上啲樓盤介紹影片，真係睇到我R晒頭】
有無留意近排網上樓盤廣告？
最近打開social media，間中會彈出樓盤廣告，一個個素人，用電話自拍，邊行邊介紹樓盤，有啲個樣似𡃁模，唔講以為參加選美；有啲就似大媽，操唔鹹唔淡廣東話。前者當睇靚女，後者當睇笑片，真係鹹魚青菜，各有所愛。
中X地產同美X物業，「中美」一直壟斷香港地產代理市場，勢估唔到兩間Marketing招數都係差唔多。採用低成本宣傳手法，叫地產代理自己拍片，然後交由中央統一後製。無錯，比起每次搵成隊crew拍，咁樣做真係慳水慳力，產量仲幾何級數倍增，但質素真係不敢恭維。
我總括見到幾個問題：
1.收音：代理戴住口罩講嘢，背景又多雜聲，仲要無後加字幕，完全聽唔到介紹緊咩。
2.聲道：有啲片用廣東話介紹，有啲片用普通話介紹，目標顧客究竟係咩人？
3.拍攝技術：拍攝樓盤內籠，鏡頭唔夠定舞龍咁舞，睇到頭都暈。
4.影片質素：有啲片好lag，有啲片像素低，有啲仲加埋美顏filter，依家係睇人定睇盤？
老老實實，買樓大拿拿畀幾球或者成千萬，唔係去街市求其買棵菜，就算只係網上介紹樓盤，拍片應該要有返咁上下質素啩？咁大間地產代理公司，竟然容許咁低質嘅影片做宣傳，完全反映到市場上壟斷情況。
每當諗起做地產代理，我哋都會聯想起學歷欠奉、淨係想搵快錢嘅人，我唔知地產代理公司點睇呢個形象。但係容許Marketing咁甩甩轆轆，前線代理成班雜牌軍咁款，某程度上地產代理公司，先要負起代理形象差嘅最大責任。
Search